Leikskólinn Tröllaborg og Grunnskólinn austan Vatna eru grænfánaskólar og fengu Grænfánann afhentan í þriðja sinn 30. september síðastliðinn.

Grænfáninn er alþjóðleg umhverfisviðurkenning. Verkefnið nýtur virðingar víða um heim sem tákn um árangursríka fræðslu og umhverfisstefnu í skólum. Nú eru rúmlega 50 þúsund skólar sem taka þátt í verkefninu „skólar á grænni grein“ víðs vegar um heiminn. Í raun er þetta stærsta einstaka umhverfismenntarverkefni í skólum hér á landi og heiminum öllum.

Landvernd er fulltrúi aljóðlegu samtakanna hér á landi  og veitir Grænfánann.

Nú eru skólar á grænni grein á Íslandi orðnir 245 talsins á öllum skólastigum frá leikskóla til háskóla en í landinu eru um 500 skólar. Grænfáninn er veittur til tveggja ára í senn og til að halda fánanum verður verkefnið að halda áfram og vera í stöðugri þróun.

Verkefnin eru bæði til kennslu í bekk og/eða í hópi og til að bæta daglegan rekstur skóla. Þau auka þekkingu nemenda og starfsfólks og styrkja grunn að því að tekin sé ábyrg afstaða og innleiddar raunhæfar aðgerðir í umhverfismálum skóla.

Bæði skólastigin hafa unnið margskonar verkefni í tengslum við umhverfismennt, s.s ræktun á grænmeti, kartöflurækt og einnig hefur útikennslan orðið markvissari eftir að við byrjuðum í grænfánaverkefninu.  Börnin föndra mikið úr endurvinnanlegu efni og búa til sinn eigin pappír. Á Hofsósi er flokkun á sorpúrgangi sem börnin eru þáttakendur í en ekki hefur verið hægt að sinna flokkun á Hólum þar sem ekki eru komnir flokkunargámar þangað. Haldin er umhverfisdagur einu sinni á vetri og dagur náttúru er einnig í heiðri hafður.

Haldnir eru fundir einu sinni í mánuði þar sem börnin fá fræðslu um umhverfismál, börnin fá að tjá sína skoðun á hlutunum og markmið eru sett og farið yfir hvort verið sé að fylgja markmiðunum.